Miłočanska skała leži w južnym dźělu Łužiskich  horinow. Wokoło 1900 započachu granodiorit wottwarjeć. 30.06.2000 skónči so potom skónčnje produkcija w Miłočanskej skale. Wot lěta 2006 wotmě so jako projekt gmejny Njebjelčicy a KRABAT z.t. přetworjenje industrijoweje branše na wuměłstwowy a kulturny centrum. Tak nastachu krok po kroku při skale bydło za nurjenske towarstwo Freiberg, kaž tež hłowne twarjenje za kulturne wužiwanje ze stron gmejny z přebywanišćom, nuznikom, myjernju a kuchnju.

Miłočanska skała je zrosćene kulturne herbstwo, kotrež ma so zdźeržeć a dale wuwiwać. Po woli gmejny Njebjelčicy nastawa „Při Krabatowym kamjenju“ w Miłočanskej skale dołhodobnje sociokulturne srjedźišćo ze stajnej rězbarskej dźěłarnju, nurjenskim arealom a kulturnym jewišćom. 30 hektarow wulki areal ma so z tym zaso ze žiwjenjom pjelnić.