Wulka překwapjenka bě, zo dósta naše towarstwo za swoje čestnohamtske dźěło w kategoriji „towaršnostno-socialny angažement“ Sakske wobydlerske myto, za kotryž jeničce w tutej kategoriji 44 nominowanjow dósta. Lawdatorka Birgit Munz, wiceprezidentka Drježdźanskeho Wyšeho krajneho sudnistwa a wot 2007  přidatnje prezidentka wustawoweho sudnistwa Swobodneho stata Sakskeje hódnoćeše towarstwo za jeho ideju KRABAT-regiona, pola kotrehož so bajowa postawa k regionalnej marce wuwiwa  a identitu twori. Towarstwo definuje so jako syć, w kotrejž komuny, towarstwa, předewzaća a jednotliwcy hromadźe dźěłaja. Zaměr je, region hospodarsce, turistisce a towaršnostnje wuwiwać.  Při tym dźe wosebje wo zachowanje wjesnych nałožkow a tradicijow kaž tež serbskeje rěče a kultury. Wyše toho twari towarstwo ze swojim angažementom mosty hač do Chorwatskeje, do domizny Johanna von Schadowitza, kotrehož eksistenca je historisce dopokazana powěsćowa postawa KRABATa.

Zhromadnje ze załožbu Cyrkwje našeje lubeje knjenje Drježdźany a z kulturnej załožbu Drježdźany Drježdźanskeje banki hódnoći swobodny stat Sakska w pjećoch kategorijach towarstwa, iniciatiwy, institucije abo jednotliwcow za jich wusahowacy angažement za towaršnosć, za tolerancu a za demokratiju. Wulka šěrokosć tutoho wobydlerskeho angažementa pokazuje so znowa we wysokej ličbje nominowanjow, mjenujcy 114. swjedźenska narěč zarjadowanja w delnjej cyrkwi Našeje lubeje knjenje Drježdźany dźeržeše ministerski prezident Michael Kretschmer