KLUČOWE PROJEKTY
Towarstwo „Na slědach Krabata – towarstwo za regionalne wuwiće dwurěčneje Łužicy z.t.“ (skrótka: KRABAT z.t.) “ wobhladuje w lěće 2001 jako swój nadawk, regionalne wuwiće w našej dwurěčnej kónčinje we wobłukach kultury, nałožkow a hospodarstwa spěchować. Při tym přisteja spěchowanju serbskeje rěče a kultury wosebita róla, přetož runje tuta jónkrótnosć, kotraž je tu žiwa, čini KRABATowu kónčinu tak luboznu a žiwjenjahódnu.
Hižo w podtitulu našeho towarstwa so wujasnja, zo maja so historiske korjenje dwurěčneho regiona zdźeržeć a dale wuwiwać. W zmysle regionalneho wuwića so hordosć za našu zrosćenu kulturnu krajinu wobydlerjam wuwědomja. Tak su hladane wsy, historiske městna, dwurěčnosć, žiwe tradicije a nałožki, kaž tež začuće zhromadnosće powabk hosćom, Łužicu wopytać.
Nimo zachowanja wjesnych nałožkow a tradicijow kaž tež historiskeho rjemjesła w dwurěčnej Łužicy dźe tež wo skrućenje regionalnych dodawarjow a jich produktow na městnje. Tole stawa so přez splećenje wšelakich akterow na kulturnej, turistiskej, wědomostnej a zdźěla hospodarskej runinje, regionalnej a nadregionalnje.
Bazujo na powěsćach a powědančkach wo KRABAće a romanowymaj figuromaj pola Jurja Brězana a Otfrieda Preußlera, kaž tež historisce pokładźeneje figury obrista Johanna von Schadowitza nastachu wot spočatka sem rozdźělne klučowe projekty, stajnje z poćahom k spěchowanju regionalneho wuwića a nałožkow z wosebitym ćežišćom na serbsku domiznu.
Na zelenej łuce nastaty kompleks KRABAToweho młyna w Čornym Chołmcu, hdźež Krabat po powěsći jako hólc njeje jenož młynske rjemjesło, ale tež kuzłanje nawuknył, skutkuje jako reprezentant. Tysacy wopytowarjow dadźa so cyłolětnje wot magije a stawizničkow Čorneho młyna zakuzłać.
Wot lěta 2002 so kóždolětnje wotměwacy KRABATowy swjedźeń, swjeći so na wšelakich městnach KRABAToweje kónčiny w Sakskej a wot 2015 kóždej dwě lěće tež w chorwatskim a słowjenskim regionje Zumberak, hdźež, kaž je so dopokazało, potomnicy chorwatskeho obrista Johanna von Schadowitza (Janko Sajatovic), kiž je historiska figura Krabata, bydla.
Mjezynarodne rězbarske dny při KRABATowym kamjenju w Njebjelčicach maja nadregionalnu hódnotu na wuměłskim polu a KRABATowy Nowy Wudwór we Wulkich Zdźarach skutkuje daloko přez gmejnske hranicy.
Na wuměłsce wuhotowanym KRABATowym hrajkanišću w Kamjencu móža so najmjeńši powěsćowej figurje hrajkajo zbližić a KRABATowa pućowanska wustajeńca sposrědkuje tójšto wědy wo bajowej postawje a historiskej wosobje.